بیرتورکی شئر
بیرتورکی شئر بیر گون واریمیش بیر گون یوخومیش
بیر قاری ننه نین بیر بیزووی واریمیش
آپارار سووارماغا آیاغی بوزدان زویه ر و سینار.
قاری ننه دییه ر: بوز، سن نه ظالیمسن !
بوز دییه ر: من ظالیم اولسئیدیم گون منی اریتمزدی.
قاری ننه دییه ر: گون، سن نه ظالیمسن !
گون دییه ر: من ظالیم اولسئیدیم بولوت قاباغیمی دوتمازدی.
قاری ننه دییه ر: بولوت، سن نه ظالیمسن !
بولوت دییه ر: من ظالیم اولسئیدیم یاغیش مندن یاغمازدی.
قاری ننه دییه ر: یاغیش، سن نه ظالیمسن !
یاغیش دییه ر: من ظالیم اولسئیدیم گؤی اوت مندن بیتمزدی.
قاری ننه دییه ر: گؤی اوت، سن نه ظالیمسن !
گؤی اوت دییه ر: من ظالیم اولسئیدیم قویون منی یئمزدی.
قاری ننه دییه ر: قویون، سن نه ظالیمسن !
قویون دییه ر: من ظالیم اولسئیدیم قصاب باشیمی کسمزدی.
قاری ننه دییه ر: قصاب، سن نه ظالیمسن !
قصاب دییه ر: من ظالیم اولسئیدیم سیچان دخیلیمی آپارمازدی.
قاری ننه دییه ر: سیچان، سن نه ظالیمسن !
سیچان دییه ر: من ظالیم اولسئیدیم پیشیک منی دوتمازدی.
قاری ننه دییه ر: پیشیک، سن نه ظالیمسن !
پیشیک دییه ر: ظالیمم ها، ظالیمم
کورسی آلتی قیشلاغیم دی، کورسی اوستی یایلاغیم دی
خانیم نمنه پیشیرسه، اودا منیم قویماغیم دی.
