بایرام
بایرام 
اوره ییم بیر تیکه اولوب!
کندین بایرام گونلری ایچون ،
اوشاقلیق گونلریم ایچون، او ایتن گونلر ایچون!
دییرلر ایتیک چتین اولار! آما بو، او ایتیک لردنده دئییل ! آخی همشه سوزی وار، ئوزی یوخدی ! هرکسدن سوروشوسان سوراغ وئریر، آما ئوزونده ، ایراغ گوریر! چوخ آختاردیقجا آز تاپیرام ! ائله بیل کی سو اولوب یئره چوکوب!!!
یوخ یوخ؛ بال اولوب دوداقلاریما یاخیلیب، دانیشدیقجا شیرینله شیر! ایللاه دا بایرام گونلری! آخی بایرام گونلرینده بیزیم، مندرس پارتارلاریمیز تزه لنمه سه ایدی ، اورک لریمیز تزه لنردی! باغ باغات دان گلن قوشلارین سسی، دام باجادان گلن قوزولار ملشمه سی، بیزیم اوره گیمیزی اوخشاییردی! بویاخلی یومورتدا لار اللریمیزی بزه ییردی، دئییب گولوشمه لر دیللریمیزی بزه ییردی . چرشنبه آخشاملاری خیرداجا اوشاقلارین الینده قوهوم قاداشلارین ائوینه بوقچادا گئدن پایلار تکجه بالیخلی پلو دئییل ایدی! بلکه اورک پاییدی! اوشاخ، یویوک اوز اوزه گلنده بر بزکلی، اوتولی پالتار لار گوزو توتمیردی! ئوزدن گوزدن یاغان محبت ، ایستک، خوش آرزیلار بیر بیریله قووشیردی.چرشنبه آخشامی ، بایرام آخشامی ، ائودن چولدن ، تنگه کوچه دن، حیطدن باجادان، دامدان دوواردان گولوش یاغیردی ، خوش گونلر آرزی دیله نیردی.حیط لرده تونقاللار قالانیردی اوشاخ بویوک اود اوستیندن ، آتیلیردیلار :
آتیل ماتیل چرشنبه ، باختیم آچیل چرشنبه . ساری لیقیم سنون، قرمزی لیقون منیم.
قیزلار سو اوستیندن آتیلیردیلار:
دورولیقون منیم، لیل لیگیم سنون.
آنجاغ چرشنبه گئجه لری منیم ایچون چوخ چتین کئچیردی آخی آتام رحمتلیک اوگئجه هر دانیشماغی بیزه قاداغان ائدردی کی، بیردن چاشیب یاوا سوز آغزیزدان چیخار آخی دامدا ، قاپی دالیندا، دووایر دالیندا نیت ائدیب قولاغ آسان اولاردی! آتام رحمتلیک اوجادان آناملا خوش سوزلر دانیشاردی: بو ئیل اینشالله یاخچی اولار، هاوا چوخ یاخچی دیر، بوئیل آلله وره جک، بویون آلله یامان راست گتیردی... وسوز آراسیدا بئله سوزلری ایشله دیردی..... بیزده آتام رحمتلیگین منظورلا دانیشماغینا گولردوک. اوگئجه نقدر اوجادان دا گولسیدوک سوز یوح ایدی آنجاغ آغلاماغ اوگئجه قاداغان ایدی.
بایرام گئجه سی هیچ کس ائوی بوش قویمازدی کی، قورشاق چی گلر بوش قایدار! او ائو یییه سی ایچون چوخ پیس ایشلردن ساییلاردی. گورردون بیردن آلتی یئتدی قورشاق باجادا ساللاندی ، ائوین آناسی دسمالارینا یومورتدا، جوراب، شب چره، نخود کشمیش ، ایده باغلاردی. قورشاقچیلاردا سرعتله چکب او بیری دام اوستونه قاچاردیلار.هردن قونشولارین بیری منیم قورشاقیمی تانیییب ایکی یومورتدا باغلایاردی.هردن ده قورشاقی دریه باغلییب ایوین کیشی سی داما چیخیب و بیز تو دابانا ...!
نوروز گلی دره ن گونلریمیز آلاچلپو آلتیندا وگتیریب قرآن وگلستان ودرسی کتابلاریمیزین آراسیندا قویماق، کارت تبریک یولداشلاریمیزا گوندرماق،و هامسینان شیرین فوتبال مسابقه لری و توپ میدانین کوره ماق و نوشقار و کل سپاقی. به قول شهریار ایندی هامسی خاطره دی یوخودی.
ایندی ، اولار کی بوگونلری ایتیرن داریخماسین!!
ایندیکی اوشاغلار بو سوزلری ائشیدنده گولورلر! آنجاغ منیمده ایندیکی لره یازیقلیغیم گلیر!!..
آخی بیز هیچدن آپاردیغیمیز لذتی بولار میلیونلار تومنله اله گتیره بیلمیرلر؟!!
سیزینجه نئجه؟؟
ائلیمیزدن کوچوب حیاتلارین دییشنلرین هامسینا رحمت ، قالانلارا جان ساغلیغی، خوش گونلر، و بیربیزه محبت، آرزیلاییرام.
یئنی ایلده کوهنه آرزیلاریوز بیتسین.
بوتون آرزیلارینوز ممکون اولسون
